Final One Liner
پروفیسر منصوری نوں ٹی وی دے اک پروڈیوسر دوست دی دعوت تے کافی دناں
توں ٹی وی ڈرامے دی کہانی دا آئیڈیا نہیں سجھدا پیا تے اج وی اوہ روٹین دے مطابق کمپیوٹر تے لکھن لکھان دے کم وچ مصروف ہوندا اے جدوں گھر دی کندھ ٹپ کے اندر آن والے دو ڈاکوواں چوں اک اوہدے سر تے پستول رکھ کے گھر وچ موجود لوکاں دی تعداد پچھدا اے تے نال ای الماریاں دیاں چابیاں منگدااے
پروفیسر بغیر گھبرائے اونہاں نوں گلاں وچ الجھا دیندا اے تے صاف صاف دس دیندا اے جے اوہدے بیوی بچے دوجے گھر شفٹ ہو گئےنیں تےاوہ وی تھوڑے دناں تکر چلا جاوے گا تے نال ای ایہہ کہ اونہاں نوں گھر وچ ہزار پنج سو روپے یا روزانہ استعمال دیا ضروری چیزاں دے علاوہ کجھ نئیں ملنا
اک ڈاکو دی ایس دھمکی دے بعد کہ ایہہ اونہاں دی پہلے واردات اے تے اوہ خالی ہتھ نئیں جان گے، اوہ ڈاکوواں توں پیش کش کردا اے جے اوہ دو گلاں وچوں اک من لین - پہلی ایہہ کہ اوہ اوہدی جیب دے چند سو روپے، اوہدا موبائل تے جیہڑی شے پسند کرن لے کے نکل جان
تے دوجی ایہہ کہ اگر اوہ ڈاکے دا خیال دلوں کڈھ دین تے اوہ اونہاں نوں چند گھنٹے دے اندر اندر اک منصوبے دے تحت اینج ہیرو بنا سکدا اے کہ ٹی وی چینلز دے رپورٹر اونہاں دا انٹرویو لین لئی اونہاں نوں لبھدے پھرن گے
ڈاکو اکھاں اکھاں وچ اک دوجے نال صلاح کردے نیں تے پروفیسر دی دوجی گل من لیندے نیں - پروفیسر منصوری اپنے تے اونہاں لئی چاء بناندا اے تے نال ای اونہاں نوں سارا پلان دس دیندا اے کہ اونہاں نے کی کرنا اے
اخیر وچ پروفیسر ہسپتال دے بسترے تے ہوندا اےجتھے چیک اپ شروع ہون توں پہلے ای اوہ نیم بیہوشی دی ایکٹنگ کردیاں ڈاکٹراں نوں دس دیندا اے کہ اونھے دراصل کافی مدت بعد دو دی بجائے نیندر دیاں چار گولیاں کھا لئیاں سن جدی وجہ نال اونھوں چکر آگیا سی
دوویں ڈاکو ٹی وی چینلز دے رپورٹراں نو دس رے ہوندے نیں کہ کیویں اوہ پروفیسر دے گھر دے اگوں لنگھدے پئے سن کہ اونہاں نے ادھے کھلے گیٹ وچوں پروفیسر نوں زمین تے ڈگدیاں ویکھیا - اونہاں نے سمجھیا پئی پروفیسر نوں دل دا دورہ پئے گیا تے کئی واری گھر دی گھنٹی وجان دے بعد جدوں کوئی نئیں نکلیا تے اوہ پروفیسر نوں آپ ای ہسپتال لے آئے
پروفیسر اپنے پروڈیوسر دوست نوں موبائل فون تے اپنے ڈرامے دی کہانی سناندیاں
ڈاکوواں ول ویکھ کے مسکرا رہیا ہوندا اے
فیر اوہ اک ڈاکو نوں اشارے نال کول بلا کے آکھدا اے کہ ہُن اوہ چوری یا ڈاکے دا خیال دلوں کڈھ دین کیوں جے سارے شہر تے سارے ملک نے اونہاں دیا شکلاں ویکھ لئیاں نیں - اے گل سن کے ڈاکو دا منہ لٹک جاندا اے
1 comments:
Post a Comment